2012年5月19日 |
完美一季 2012-05-16 隨住0係英超煞科戰作客以1:3不敵愛華頓，紐卡素最後只以第5名衝線，未能殺入歐聯，但以紐卡素既資源，今季羅到咁既成績其實已經係超額完成。成功係無捷徑，經過下季歐霸盃既試煉，我相信紐卡素將會打下更好既基礎。趁住球季岩岩完結，朱楓今日想同大家分析下今季喜鵲重新起飛既主因同為各球員評一評分！ 成功原因 1/賽程有利 紐卡素今季頭11場聯賽，最勁只對過阿仙奴同熱刺，結果因為長期保持不敗，愈羅愈多信心。 2/買賣得宜 紐卡素今季初賣走祖爾巴頓、路蘭同荷西安歷基3大主力，好多人都覺得紐記可能再次捲入降班漩渦，點知新買既卡比耶同丹巴巴亞都即時起到作用，季中加盟既柏比斯施斯，更堪稱係舒利亞後，紐卡素0係英超史上最佳收購。 3/列強跌watt 紐卡素最後排第5，但其實都要多得利物浦同車路士今季嚴重失準而有機可乘。 4/防線可靠 好多人都覺得紐卡素成功靠進攻，但朱楓覺得防守先係紐記今年成功既原因，由高洛仙尼、史提芬泰萊同告魯爾組成既核心防線，更一度係全英最少失球球隊。 5/變陣成功 紐卡素今季上半季主要打442，但到中段不停失分後，領隊柏杜博一鋪轉踢4321陣容，結果畀佢成功博到。 6/一早0係盃賽出局 其實柏杜0係今季初期，曾經表示希望今季想搶盃幫紐卡素破錦標荒，可惜0係聯賽盃同足總盃都一早出局，但如果唔係一早唔使兼顧盃仔，紐卡素最後0係英超肯定羅唔到第5。 最後我想為紐卡素今季每位英雄評一評分(10分為滿分) 告魯爾 9分 呢位荷蘭門將今季進步神速，多次近距離救出必入球，最恐怖依家仲得24歲，簡直前途無限。 高洛仙尼 9分 經過一季英冠浸淫、再獲委任隊長，呢位爆炸頭今季表現脫胎換骨，0係後防簡直係一夫當關。 史提芬泰萊 7分 上半季表現出色，亦係紐卡素當時不敗既關鍵，可惜季中重傷，希望佢下季可以健健康康為紐記再爭佳績。 丹尼森遜 5分 今季除左多次護空門後，其實整體表現一般，簡單D講，攻不稅，守不穩，傳聞佢想走人，我覺得無所謂，但如果佢下季繼續留低，好希望佢可以有改善。 賴恩泰萊 7.5分 上半季客串左閘有超出色表現，多次射入世界波，下半季狀態明顯跌WATT，但間中落場都交足功課。 大衛辛頓 7.5分 上半季明顯未適應，但下半季愈踢愈有，助攻非常出色，相信下季將有更大進步。 白治 7分 上半季被人插到飛起，但下半季好似變左另一個人，客串防守右閘都有水準演出，博到利物浦門將連拿領紅，先知原來佢有潛質拍戲。 米克威廉臣 7分 實力一般，但勝在夠勤力，但預計下季史提芬泰萊復出，兼0係新人加盟後，想再有出場機會好難。 卡比耶 9分 一句講晒，攻守兼備，頂路蘭果位綽綽有餘，校炮遠射罰球瓣瓣掂，簡直係史必同羅拔李爾既混合體。 約拿斯古迪利斯 8分 依舊咁勤力，難得下半季改打介乎防中至左翼之間表現都無咩跌WATT，絕對係紐記回勇既無名英雄。 迪奧迪 7分 今季表現明顯無上季咁標青，但整體表現合格有餘，希望紐卡素今個暑假留得住呢位防中。 古費利 6.5分 季中踢過一排好波，可惜紐卡素中場實在太多勁人，加上季尾受傷，只能嘆時不與我。 賓艾化 7.5分 上半季明顯仲未走出重創既陰影，點之下半季黎料，成日一個扭幾個，令人印象深刻！ 丹高士寧 4分 其實佢潛質唔錯，但唔知係佢個人有問題，定柏杜唔鍾意佢，上陣時間極少。 馬維奧斯 4分 加盟時講到好勁，季初有幾場波表現都唔錯，點知勁快又受傷，希望佢下季可以健康，俾紐迷睇到佢真正實力。 奧巴坦 6分 上半季俾人插爆，但朱楓覺得佢其實潛質唔錯，至少肯夠膽扭，希望佢下季可以學到係適當既時候做適當既野。 柏比斯施斯 9分 加盟英超第一場就入波，之後仲入波入到停打破多項紀錄，適應力非常強，效率極之驚人。 丹巴巴亞 8.5分 上半季紐記入波幾乎靠晒靠一個，但下半季好似俾同胞施斯羅走晒D入波運，但整體表現仍然值得俾LIKE。 貝斯 6.5分 下半季因傷近乎隱形，但開咧頭幾場波佢表現勁SHARP醒，有力做艾美奧比既接班人。 艾美奧比 7分 今季擔當後備殺手出奇地好，今季係英超入既兩球(分別對熱刺同新特蘭) 都極之關鍵，老味神絕對唔係浪得虛名。 柏杜 9分 最近聽到好多人都話紐記今季彈起唔關柏杜事，主要係班球員努力，但如果柏杜無料，班球員根本唔會聽佢支笛，最終業界亦選佢為本年度英超最佳領隊，佢私底下應該好有過人之處(應該係溝通方面，同球員同高層)，而且0係場邊亦多次顯示激情一面，我相信時間會證明佢0係咪紐卡素最適合既領隊人選。 PS:由於英超已完結,紐卡素暫時有一段時間無波踢,所以朱楓呢個專欄會暫時休息一下。今年係朱楓首次0係度寫專欄，唔知大家有咩意見？好壞都想聽下，或者想下季加D咩元素？歡迎賜教。我會盡量配合，THX =========================================== 朱楓--現職《太陽報》波經專家 
簡介：80後，愛上紐卡素已超過15年。見證「喜鵲」由盛轉衰，但仍然不離不棄，因為堅信紐卡素終有一日會稱霸英超。 喜歡捐窿捐罅發掘紐卡素資訊，想第一手知道「喜鵲」最快、最新及不為人知新聞？這個手記必定可以幫到你！
|
